An siopa :: An Spailpín Fánach

Thosnaigh An Spailpín Fánach i 1979 mar thionscnamh beag a raibh d'aidhm aige an Ghaeilge a thabhairt isteach sa nua-aois trí shuaitheantais, greamaitheoirí agus T-léinte Gaeilge a dhearadh agus a chur ar fáil. Ar feadh blianta ina dhiaidh sin chaith muid míonna an tsamhraidh ag taisteal ó cheann ceann na tíre "ag díol is ag reic ár sláinte" ar nós na spailpíní fadó. Thugadh muid cuairt ar na Gaeltachtaí ar fad, rinne muid neart cairde nua, agus d'fhoghlaim muid go leor.

Ó 1985 i leith tá muid lonnaithe i gCeardlann an Spidéil, ionad breá tarraingteach, áit a n-oibríonn grúpa lámhcheardaithe i dteannta a chéile i suíomh álainn ar bhruach na mara. Is ionad de chuid Údarás na Gaeltachta an Cheardlann.

Spailpíní Lá Pádraig :: An Spailpín Fánach

Síodchló an phríomhcheard a bhíonn ar siúl againn féin. Déanann muid féin an dearadh agus cuirtear na léinte agus earraí eile i gcló ar an láthair. Déanann muid iarracht teacht suas le smaointe agus dearadh nua ar bhonn rialta. Is é Turlough O'Connor ár mbainisteoir priondála, agus sí Hedi Gotthalmseder (Ostaireach bhreá eagraithe, a choinníonn smacht orainn) atá anois ag bainistiú an tsiopa. Aon jaibeanna beaga fánacha eile a bhíonn le déanamh, fágtar fúmsa iad. Sa samhradh bíonn cúnamh breise againn ó dhaoine óga cumasacha ón cheantar.

Bunaíonn muid ár gcuid dearaí ar an dúchas, ar an tseandálaíocht, ar sheanfhocail agus roinnt cartúin fiú. Is maith linn a cheapadh go bhfuil rud eicínt againn don uile dhuine. Cé go ndíríonn muid go príomha ar ár gcuid táirgí féin, ciallaíonn an spás siopa atá againn sa gCeardlann, go bhfuil muid in ann réimse níos leithne d’earraí a chur ar fáil sa siopa anois. Chomh maith le T-léinte agus geansaithe tá cártaí beannachtaí, leabhair & cluichí do pháistí agus do dhaoine fásta, dlúthdhioscaí, cúrsaí Gaeilge, clúdaigh cuisíní síoda, scairfeanna Ceilteacha veilbhit agus iliomad earraí eile.

Sé an aidhm atá againn, freastal ar lucht na Gaeilge agus orthu siúd ar mian leo an Ghaeilge a shníomh isteach ina saol laethúil. Sa samhradh fáiltíonn muid roimh na mílte stráinséirí ó thíortha eile agus is breá linn an dúchas Gaeltachta a roinnt leo.

Is mór linn do thacaíocht.

Faigh Ár Nuachtlitir

Cuir d'ainm leis an liosta-poist don nuachtlitir.

Liostáil

Ár Sonraí Teagmhála

Ceisteanna ar bith? Cuir glaoch gutháin nó nóta ríomhphoist chugainn.

An Spailpín Fánach
+353 (0) 91 553 343
+353 (0) 91 553 017
Ceardlann an Spidéil, An Spidéal, Co. na Gaillimhe, Éire

Cá bhfuil muid ?

Ceardlann an Spidéil :: An Spailpín Fánach

Tá siopa an Spailpín Fánach lonnaithe í gCeardlann an Spidéil, ionad breá ceardshiopaí suite go gleoite ar Chuan na Gaillimhe, agus ag breathnú amach ar an mBoireann agus ar Oileáin Árainn. Is fiú go mór an turas gearr a dhéanamh siar ó Ghaillimh to dtí Geata na Gaeltachta. Tá 10 gcinn de cheardshiopaí ar an láthair maraon le an Builín Blasta, áit a chaithfidh tú lón breá folláin ar do shuaimhneas. Agus céard faoi snámh beag fad is atá tú ansin, nó ar a laghad siúlóid shláintiúil ar an gcladach?

Winner Web Award 2013